Эмилия Степановна чужис да быдмис уна челядя семьяын. Челядь пиысь вӧлі медыджыдӧн, сы бӧрся ӧти бӧрся мӧд быдмисны нёль вок. Став сьӧкыд уджыс семьяын судзсис Эмилиялы: и мам-батькӧд радын уджавны и посни вокъяс бӧрся видзӧдны. Нинӧмысь эз ӧтдорччыв ныв, быд удж сылӧн киясын артмывліс бура. Школа помалӧм бӧрын велӧдчис учительӧ. Медводз индісны Пожӧгын уджыштны. Сюсь том ныв удитліс и клуб самодеятельностяд уджавны и комсомол комитетын мырсьыштны. Сэн жӧ и тӧдмасис ас кодьыс жӧ авъя да быдлаӧ сюртчысь том морткӧд, кодкӧд ки-на-ки коллялісны нэм. Гозъя чужтісны да быдтісны куим ныла-пиӧс, ставныслы сетісны бур тӧдӧмлунъяс. Верӧс Михаил Амосович век уджаліс кывкутана уджъяс вылын, Эмилия Степановна школаын роч кыв да литература велӧдіс. Уна бур кыв вӧвлӧм велӧдчысьяс висьталӧны сы йылысь, оз вунӧдны, пыдди пуктӧны бур велӧдысьӧс. Со и талун юбиляршаӧс волісны чолӧмавны сылӧн вӧвлӧм велӧдчысьяс, а сідзжӧ, Помӧсдін администрациясянь юрнуӧдысьӧс вежысь Мальцева Татьяна Федоровна, Кулӧмдін районса ветеранъяслӧн сӧветса веськӧдлысь Сазанович Елена Александровна, Помӧсдін ветеранъяслӧн сӧветса председатель Карманова Нина Ивановна, школаса директор Сизова Лариса Васильевна да сылӧн медводз вежысь Бизина Любовь Васильевна, школаса вӧвлӧм велӧдысь Уляшева Раиса Александровна. Быдӧнсянь юбиляршалы вичмис бур сиӧм да козин.
Аттьӧ Тіянлы, пыдди пуктана Эмилия Степановна, бур дзоньвидзалун Тіянлы да дыр на овны!
Присоединяйтесь к ОК, чтобы подписаться на группу и комментировать публикации.
Комментарии 8