Эрзянь мель - эрзянское мнение, самосознание.
Эрямоёжот - отношения
Ава-цёра ютксонь эрямоёжотне - отношения между женщиной и мужчиной
Вейке паро ломань кевкстимим:
"Кодамо сон, койсэть, алкуксонь, эли, меремс, асатыкстэме, эрзянь авась?"
Койсэм, сон истямо, кодат ульнесть монь сырькаем, авам, сазором, минек велень аватне.
Васняяк, чевте седей. Тевс маштыця, мазый, превей, ваньксстэ оршниця, важодиця, виздиця; мирдень, эйкакшонь, нуцькань вечкиця, мелень ваныця.
Кодамо сон, койсэть, алкуксонь, эли асатыкстэме, эрзянь цёрась?
Истямо, кодат ульнесть покштям, лелям, минек велень цёратне.
Ламо а кортыцят, важодицят, лиянень лездыцят. Тевс маштыцят, превейть, сэтьметь. Коронь кирдицят. Лия ломанень мелест ваныцят. Валонь кирдицят.
"Кодамот, койсэть, ульнесть кезэрень пингень эрзянь аватне?"
Койсэм, истяткак, кодат улить неень шкань эрзянь аватнеяк. Ансяк сестэ сынь озныльть аволь лия раськень пазнэнь. Сестэ озныльть Инешкипазонтень ды кирдсть-ванстсть эрзянь раськень койтнень-илатнень. Секскак эйкакшост тонавтсть эрзянь кельсэ кортамо, аволь шабра раськень кельс. Секскак эйкакшост кысыльть эрзянь ломанекс, эрзякс, эрзянь мельсэ эрицякс.
"Кодамот, койсэть, ульнесть кезэрень пингень эрзянь цёратне?"
Истят, кодамот неень шкань цёратнеяк. Ансяк кезэрень эрзянь цёратне маштсть идеме эрзянь раськест. Чуросто микшнесть пряс лия раськенень. Эрясть эрзянь мельсэ.
"Кодамот, койсэть, эрзяватне ней?"
Седеяк мазыйть. Эрзянь аванть мазычизэ нейгак неяви седе парсте, зярдо сон оршазь эрзянь оршамосо. Эрзянь оршамотнесэ пек парсте неяви эрзянь аванть мазычизэ, ёлганя, теке марто кеме рунгозо, мазый сельмензэ, черензэ. Зярдо неень шкань авась корты эрзякс, маряви, теке цёков чоледи-цёкорды.
"Кодамот, койсэть, эрзянь цёратне ней?"
Цёратне, койсэм, лавшомсть. Ламот симить. Кроить. Стувтыть эрзянь келенть, эрзянь койтнень-илатнень. А ванстыть эрзянь меленть. Пек сеедьстэ урьвакстнить аволь эрзянь тейтерень лангс. Секс эрзянь раськесь кармась пек куроксто рузыямо.
"Мейсэ, койсэть, явить эрзянь аватне лия раськень аватнень эйстэ?"
Эрзянь аватне пек кеместэ вечкить эсь мирдест, эйкакшост, нуцькаст, эсь кудораськест.
"Мейсэ, койсэть, явить эрзянь цёратне лия раськень цёратнень эйстэ?"
Валонь кирдемасо.
"Кодамот, койсэть, эрзянь авань-цёрань ютксо эрямоёжотне?"
Секеть, кодамо лия раськень аватнень-цёратнень ютксояк. Ансяк эрзянь аватне ды цёратне а вечкить эсь вечкемаст, эрямоёжост, невтнеме лия ломанень сельме икеле. Васняяк. эрзятне а вечкить панжадо, ломанень икеле палсеме, кутморямо.
Эрюш
Вана истят мельть састь превезэм неть кевкстематнень кувалма.
Койсэм, паро улевель, лия эрзятнеяк арсезевельть неть кевкстематнень коряс, ды сёрмадовлизь эсь мелест.
Койсэм, те эряви миненек, эрзятненень, эрзянь раськентень.
Терявтодо, эрзят!
Присоединяйтесь к ОК, чтобы подписаться на группу и комментировать публикации.
Нет комментариев