КУГАРНЯ газет

⛴ Юрино ден Кокшайскыште турист судно-влаклан причал-шамыч лийын кертыт 2024 ийлан Юрино посёлкышто пассажир причалым ышташ проект да паша документацийым ямдылаш кундемысе бюджет гыч 15 миллион теҥгем ойырымо. Тыгак Марий Эл Республикын Минтрансше Кокшайскыште изыскательный пашалан оксам налын. Тушто причал пырдыжым чоҥышаш улыт.

Пошкырт кундемыште ӱдыр-рвезе-влак коклаште тӱнясе калык-влакын йомакыштым каласкалыме шотышто конкурс лийын. Тудым Башкирийыште илыше калык-влакын шочмо йылмышт дене ойленыт. Сеҥыше-влак коклашке марла каласкалыше-влакат логалыныт. Тиде Мишкан селасе 2-шо номеран полилингвальный шуко профилян школын 3-шо классыштыже тунемше Алиса Алтынбаева, Калтаса районысо 2-шо номеран Краснохолмский школышто 4-ше классыште тунемше Иван Биктимиров да эн изи участник, Пӱрӧ оласе 1-ше №-ан «Айгуль» йочасадыш коштшо вич ияш Артур Ахметшин. Конкурсышто сеҥыше-влак Пошкырт кундемысе «Эрвел Марий» региональный национально-культурный автономий деч пӧлек-влакым налыныт. Родион Плотников.

ЛЕНИНГРАД областьыште - ПЕЛЕДЫШ пайрем 25 майыште ты кундемысе Всеволожск олаште «Пеледыш пайрем» эртен. Погынышо-влакым Марий Эл гыч мийыше "Марий памаш" калык фольклорно-этнографический ансамльат куандарен. Тыштак «Пеледыш пайрем глазами молодых художников и фотографов» регион-влак кокласе ЭтноПленэр почылтын. Марий книга савыктыш у книгаже-влак дене палдарен. Марий Эл Республикысе Калык усталык рӱдерын лаштыкше гыч налме фото-влак.

Самырык вуетым пыштенат Таче Морко район Кугу Кожлаял ялыште СВО-што вуйым пыштыше Николай Олегович Афанасьевлан (28.05.2001-04.04.2024) илыме пӧрт пырдыжешыже шарнымаш оҥам почыныт. Эн лишыл еҥже, пошкудыжо, йолташыже-влак тудым шарналташ погыненыт. Кажныжым шарнена, кажныж ончылан вуйнам савена!!! Ю.З.Петровын фотожо-влак.

Таче Москошто ВДНХ-ште - Пеледыш пайрем. Тудо 250 утла артистым чумырен. 📷Эльвира Куклина.

МАСТАР ДЕЧАТ МАСТАР Кужэҥер район Тошто Йӱледӱр тӱвыра пӧртыш пурымеке, маскироватлалтме сеткылан рӱдӧ сеткыжым пидше ӱдырамаш дене палыме лийым. Сеткым пидеш «Маргарита Ивановна Кузнецова улам, – мане. – Сеткым пидаш тунемаш февральыште лӱмынак Шернурышко миен коштна. Мыланна куд метр кутышан да кум метр лопкытан сеткым пӱчкын пуышт, вара шкеак шӱртӧ дене пӱтыреда маньыч. Колым кучаш вапшымат тыгак пидыт. Мый клубышто кечывалым пидам, а тӱвыра пӧрт вуйлатыше Людмила Васильевна – кастене мӧҥгыштыжӧ. Тыге 23 сеткым коктын ямдыленна». Мутланымыж годымат 58 ияш мастарын кидыштыже шуша пӧрдеш гына. Чот кыртмен шупшмылан кид нойымо нергенат палдарыш. Маргарита Ивановна такшым неле пашам ыштен тунемше: шочмо ялысе Чапаев лӱмеш озанлыкыште (кызыт вес лӱман) 25 ий дояркылан тыршен, варажым тӱвыра пӧртыш кочегарлан пашаш пурен, пенсийыш лекмыж марте ты сомылымак шуктен. Кузнецовмыт чапле кермыч пӧртым чоҥен шынденыт. А пӧрткӧргышт мотор пеледыш да сылне тӱр дене волгалтеш. Пӧртыш пурымеке, кок йӱксым да йырже пеледышым тӱрлеман ковёрым ужна. Моторын койшо ты тӱрым эше икмыняр ий ончычак тӱрленам мане. Омсалондем ӱмбалнат алмазный мозаике дене ыштыме кок йӱксӧ йылгыжеш ыле.

📖 24 гыч 26 май марте Пошкырт кундем Уфа олаште «Китап-байрам» книга фестиваль эрта. Марий Эл гыч тушко «Марий книга издательстве» савыктыш пӧрт шке сатужым намиен. Кум кече жапыште ятыр мастер-класс, писатель-влак дене вашлиймаш, лекций, конкурс, кидпаша ярмиҥга лийыныт. Таче книга фестивальыш Мишкан районысо марий историй да культур рӱдерын пашаеҥже-влак миеныт. Нуно марий семӱзгар шотышто, вынер куымо да пу гыч пӱчкедыме мастер-класс-влакым эртареныт, «Ший памаш» калык фольклор ансамбль сӱан йӱлам ончыктен. 📸 Рӱдерын архивше гыч налме фото-влак.

ПОЖАРЫМ ЙӦРТЫМАШКАТ КИРЫМ НАМИЕН 11-12 майыште Угарман кундемысе Бор олаште кирым нӧлтымӧ дене ты кундемын чемпионатше лийын. Тушто Россий МЧС-н Марий Элысе тӱҥ управленийжын пожарныйже Радиф Алексеев таҥасен. Рвезе чемпион лӱмым сулен. Июньышто тудо спортын ты видше дене Российын чемпионатышкыже ушна. Таҥасымаш Улан-Удэ олаште лиеш. Р.Алексеев кирым нӧлтымӧ спортын 78 килограмм нелытан-влак коклаште двоеборье дисциплиныштыже (32 килограмм нелытан кок кирым толчок-рывок семын) нӧлташ тӱҥалеш. Алексеевын спортыш толмо корныжо да Российысе таҥасымашлан ямдылалтмыж нерген мутланышна. Тудо тыгерак каласкалыш: – 2017 ийыште Россий МЧС-н Марий Элысе 6-шо пожарный частьышкыже пашаш толынам. Тунам пожарный часть-влак коклаште кирым нӧлтымӧ дене таҥасымаш лийын. Мыланем тушко ушнаш темленыт. Таҥасымаште 24 килограмм нелытан кок кирым нӧлташ кӱлын. Мый нылле гана нӧлтенам. Тылеч ончыч тыгай спортышто шкем ик ганат терген омыл ыле. Таҥасымаш деч вара мый шиждымын-вучыдымын ты спортыш толынам.

КИШ ГЫЧ ЫШТЫМЕ МОТОРЛЫК Шке кид дене ыштыме ӱзгар куаным веле огыл конда, тыгак оксам ыштен налаш полша. Теве Инга Авраменко киш дене тӱрлӧ сӧрастарышым ышта да ужала. Инга Йошкар-Олаште шочын-кушкын. Школышто тунеммыж годым ӱдырлан географий предмет келшен, сандене шкаланже пӱртӱс дене пайдаланыше профессийым ойырен налын. Вара ПГТУ-што экологий да пӱртӱс дене пайдаланыме специальность дене шинчымашым поген. – Тунеммем годым ты профессий мыланем келшымым чарнен, сандене шке специальность дене пашам ыштен омыл. Шкемым тӱрлӧ аланыште терген онченам. Телефонлан аксессуарым ужалыме кевытыште пашам ыштымем годым ювелир киш дене тӱрлӧ сӧрастарышым ышташ лийме нерген пален налынам. Мыланем ты сомыл келшен. 2021 ийыште киш дене сӧрастарышым ышташ тӱҥалынам, – ойла Инга. Тыгай сомыллан кидмастар шке гыч тунемын, интернетыште тӱрлӧ ой-каҥашым лудын да видеом ончен.